Վերադառնալ պատկերասրահ
Կյանք և Արվեստ
Էմմա Դիլանյանը ծնվել է Երևանում՝ արվեստի հենքով հարուստ միջավայրում: Չնայած որ մանկության տարիներին ծնողները նրան ուղղորդում էին դեպի երաժշտական ուղին, նրա ստեղծագործական ձիրքը առավելապես դրսևորվեց կերպարվեստում: Դեռ վաղ տարիքից Էմման զգում էր գեղարվեստի հանդեպ իր խոր հետաքրքրությունը, որն ավելի նպատակային դարձավ 13 տարեկանում, երբ առաջին անգամ ինքնուրույն սկսեց ուսումնասիրել նկարչության հիմունքները:
Դիլանյանի կրթության ուղին նշանավորվում է Երևանի Փ. Թերլեմեզյանի անվան քոլեջում,ապա Չեխիայի Յիհլավա քաղաքի գրաֆիկական քոլեջում, որտեղ նա զարգացրեց իր գեղագիտական մոտեցումներն ու ամրապնդեց վարպետությունը: Ուսանողական տարիներից ի վեր նա մասնակցել է բազմաթիվ ցուցահանդեսների՝ ներկայացնելով իր եզակի և բազմաբնույթ աշխատանքները:
Այսօր Էմման շարունակում է իր ճանապարհը արվեստի դաշտում՝ մասնակցելով թե՛ տեղական, թե՛ միջազգային ցուցահանդեսների: Բացի իր գեղարվեստական գործունեությունից, նա հանդես է գալիս նաև որպես կուրատոր՝ կազմակերպելով տարբեր նկարիչների ցուցահանդեսներ ու գեղարվեստական միջոցառումներ՝ նպաստելով հայ ժամանակակից արվեստի զարգացմանն ու տարածմանը:
Էմմա Դիլանյանի ստեղծագործական ուղղվածությունը ընդգրկում է և՛ ֆիգուրատիվ, և՛ բնապատկերային ժանրերը, որտեղ նա համադրում է գույնը, ձևը և տարածությունը՝ փորձելով որսալ մարդու և բնության միջև փոխհարաբերության նուրբ նյուանսները: Արվեստն Էմմայի համար ինքնարտահայտման խորն ու հուզական ձև է՝ հնարավորություն տալով ուսումնասիրել մարդկային հոգին և բնության անվերջանալի գեղեցկությունը՝ ստեղծելով երկխոսություն, որը խոսում է դիտորդի հետ:
